म्यानचेस्टर सिटीको लगातार तेस्रो जित
इंग्लिस प्रिमियर लिगमा यो सिजन सोचे जस्तो राम्रो प्रदर्शन गर्न नसके पनि च्याम्पियन्स लिगमा भने म्यानचेस्टर सिटीले लगातार जितको यात्रा कायम राखेको छ ।
समूह सी अन्तर्गत मंगलबार राति भएको खेलमा म्यानचेस्टर सिटीले ओलम्पिकासलाई ३–० ले पराजित गरेको छ । सिटीका लागि फेरान टोरेस, गाब्रियल जिसस र जोएओ क्यानसेलोले गोल गरेका हुन् ।
१२ औँ मिनेटमा केविन डी ब्रूयनाको सहयोगमा टोरेसले गोल गरि सिटीलाई सुरुवाति अग्रता दिलाए । डी ब्रूयनाकै सहयोगमा जिससले ८१ औँ मिनेटमा गोल गरेका हुन् ।
९० औँ मिनेटमा क्यानसेलोले गोल गरेपछि सिटी विजयी भयो । लगातार तीन खेलमा जित निकालेको सिटी ९ अंकसहित समूहको शीर्ष स्थानमा रहेको छ ।
सोही समूह अन्तर्गत मंगलबार राति भएको खेलमा एफसी पोर्टोले मार्सेइलीलाई ३–० ले पराजित गरेको छ । ६ अंकसहित एफसी पोर्टो दोस्रो स्थानमा छ । ओलम्पिकास तीन अंकसहित तेस्रो स्थानमा छ ।
